Betrifft: Rezepte

Mini Kochrezeptr hen in dr Regl keini Mengeangabe. So het mr freair nit kocht. Mr het gluagt, was mr do het un het losglegt. dea meischte hän freair a par Heahnr ka, also Eier.
Im Keller hen d Herdepfl glagert, a Fässli Moscht vum Epfelbaim, s Sürkrütfässli, vilicht aweng Gsalzes iglegt, dr Büch vu dr Soi, dFeasli, etc.
Imachglesr, mit Obscht, Gmeas, ich erinner mich an Bohne im Glas, Mirabelle, Kirsche, un Zwetschgeschleck.
Im Raich ibrm Herd isch dr Speck ghängt un frisch Gmeas isch üsem Garte kumme.

Wenn dLid sage, hitzdag schmeckts nimmi wea freair, no leids dodra, das hitsdag eifach nimmi dea Zuatate wea freair do sin. Freair het mr mit Schmalz kocht un backe, hitsdag mit gschmacklosem Ehl, odr megligscht ohni Fett. So greagsch halt kei Gschmack dri.
Freair het jeder si eige Schmalz gmacht, hitsdag keie si bim Metzger in Ohnmacht, wenn dr noch wissem Speck frogsch un Schmalztepf sin nur no Zierde ufem Kuchikenschdrli.

Wer freair kei Kuah kha het, isch zum Nochber, het dert mim Milchkännli a Litr gholt, dea Milch het noch nach Milch gschmeckt un nit nach wisgfärbtm Wasser. Butter war gäl, vu dr Sahne un Butter hetmr gschmeckt, des künschtlich Zigs üsem Supermarkt het nix mit Butter zdua.
In jedem Dorf gabs a Milchzentral, dBüre hen ihri ibrschissig Milch dert hi brocht un miteme Märkli het mr dann hole kenne. Üs dr reschtliche Milch hen si dann Milchprodukte gmacht. Bibilikäs, Joghurt, usw.

dLit hen no kei Gfiertruhe kha, Truhe gabs im Keller vu dr Schual, jeder het kenne si Fleisch dert nilege un, dr weres nit glaibe, keiner het klaut!
Wenn dr Hirschwirtsepp (unsr Metzgr) gschlachtet het, hets fir a paar Pfennig Tellergallere gä, des war als a Geadi. Dr het immr fir dKindr a Wienerli kha, Knoche gabs umsuscht un neamä het sich gschämt, wennr eifach a paar Knoche gholt het, fir a Supp, odr Soß.

Abr ich schweif ab, jedenfalls so hedmr si Zigs zammekha un dorüs hetmr dann kocht.